sagooor

ساجور بت اللذين احبهم سرا
 
الرئيسيةالبوابةمكتبة الصورس .و .جبحـثالتسجيلالأعضاءالمجموعاتدخول

شاطر | 
 

 مكتبه الشاعر ازهري محمد علي

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
Admin
Admin
avatar

المساهمات : 166
تاريخ التسجيل : 21/01/2008

مُساهمةموضوع: مكتبه الشاعر ازهري محمد علي   الجمعة ديسمبر 26, 2008 11:59 pm

ثلاثه مقاطع لطفل ما/ أزهري محمد علي

مدخل اول:

((من كان منكم بلا خطيئه فليرمه بحجر.)

أعلمُ أنك حجر لا تضر ولا تنفع

ولو لا أنني رأيتُك تكسر جدار الصمت العربى لما قَبلتُك.



مقطع أول:

كانت نضالاتَكْ حِلم زي كُلْ علامات الأسى

تسلب مخاوفنا وتعيد لبيوتنا

حلم الانتصار

أو زي حكايات المساء

تَلهِب عواطِفْنا وتموت

بيناتنا فى وضَح النهار

يا مْصَحِّى جُوانا الغضب

يا مْذكِّى فى نفوسنا اللهب

يوم كان ثباتنا والانكسار

كانت نضالاَتكْ حِلم

والحلم من دونه الكوابيس

والأرْضِ من دُوَنا المتاريس



والرَكْب قِدَّامو المطاميس - البوار

تَدْ فٍن توارِيبَكْ قَمِح..تَطْرَح قنادِيلك دَمار

لَمِلم جراحاتَك للشَّمس

تَنْضَح مسامتَكْ غُنا

وتَمْطِر سماواتك حُجار



مقطع ثانى:

وسْوسْتَكْ بِكِلْمة سِّرْ

عَوّزتَكْ من عين الناس الشافيه

كَلّمْتَك بالموت والبعْث

بالعرس الأكبر وصيِّتَكْ

زَفّيتَك للمدن الدافيه

حدّثْتَك بالفرق الواضح جداً

ما بين الدِين والمافيا

عتّقتَكْ بدمِ الشُهداء

جَرْتَقتَك بعرق العافيه

قَدَّمتَكْ ودسَّيتْ فى إيدك

حجرين واللون .. والقافيهْ

مقطع ثالث:

بتْسَاسِق يا ولدى نهارك

تسأل عن اسم وهويه .. وجِنْسْ

تسأل عن بيت أو رِمْسْ



وتعود والليل كضَّاب

سجيِّل.. سجيّل غضبك وحجارك

تاهتْ بين القفطان والكاب

بين خُطب الأسياد اللّخْمَه

البال الخمران بالتُّخْمَه

وقانون - الغاب

والأرِض البينك ما بينا

ألغَام ومُلوك - وكلابْ

بِنْسِلَّها حتماً يا ولدى

من بين المِخْلب والناب....
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://sagooor.montadamoslim.com
Admin
Admin
avatar

المساهمات : 166
تاريخ التسجيل : 21/01/2008

مُساهمةموضوع: رد: مكتبه الشاعر ازهري محمد علي   السبت ديسمبر 27, 2008 12:02 am



نخــــلـــــه وأبنــــوســـــــه / أزهري محمد علي

يا زوله..

الصوت الطالع منِّى

بِدِّي مسامعِكْ راسْ الخيط

والشوْفْ البِحسِبْ

حَبّ الرَّمل التِحْتِكْ

بِعْرِفْ رنَّة ضحكِكْ

رقم الهاتف

وشارع البيت

والخوف البِفْضَح صمتي

بِعرفِكْ إنتى

يعلم إنِّي

مانى المالي هُدومي

ومافي الجُبَّهِ

إلاَّ إنتي..

زوله..

وكاكاو الدم الفيكْ

مين السّماكِ سِفاح

مِنْ رِحِم أبنوسه ونخله

مين الورّاك إفراز الشهد

وأدَّاكِ مذَاقْ مِن ريق النحله

كضّابه الغابه القالَت

تَشتِلْ أنْناسَه على الصحرا

كضّابه القلتى حتفصلِّى توب العِيد للَهَلهْ

كضّاب القلتَ ملْحوقه خطاوى المَهَلَه

يا زوله..

مخنوقه الشهقه الفي رئتي اليمنى

محمومه خلايا الدم والزفره

مهمومه شِعاب القفص الصدري

مَمْحوقه حُلول الشفره

مفقود مُفْتاح الباب السرِّى

!تذكَّرْ

وين لاقيتَكْ صدفه؟

قالتلى - حبيبة القلب الأولى

والفرح المُعْلَن مدسوسْ

دسيتْ على رِحم الذاكره النُطفه

فى هذا الزمن السوس

إتْرَفَعَتْ بيناتنا الكُلفه

غنيتِكْ نَخله وأبنوسْ

ومَشيِتكْ متقرّب لعيونمِكْ زُلفى

!تذكَّر وين لاقيتك صدفه

!أذْكُرْ كنَّا عناصر شتّى

إكتملتْ بينَاتْنا العِفَه

والصيف الاذِع شتَّا

صَفَق النِيم إتساقَطْ حَتَّ

طَرْفَه لَمَحتِكْ

شِلْتَ النفَسَ

الأبى يتْخَتَّ

يضْحَكْ صَحْوك

نوّر كل مناحي الحِتَّه

وما اتسائلتَ عن اسمِك حَتّى

إتلمينا عليكِ وبَغْتَه

دسّيِنَاك من خَفَر الليل

فسّحناك المليون ميل

صَرّينا تُراب أقدَمِكْ فى مِنْديل

وشَهلنَاكِ هُتاف

ومديحْ

وصهيلْ

وقدمناك قُربان للنيل

وكان من عِنْدكِ بَدَت لصحوه

جيِتك مِنِّكْ

شادِّى خَيال الشوق الصهوه

بَدينا نفلِّى الروح

مِنْ نَزَقَ الشهوه

وإترجّلتَ بفعل النخوه

جلسنا نخمِّس فنجان قهوه

إتشاركنا الزاد والمقْعَد

فَتَحنا ملف الزمن الأبْعَد

قام الفرح الطوّل مُقْعَدْ

لا قيناكْ دلوكه ودبكه

إتسالمنا سلام غُبار السِكّه.



!زوله

وكاكاو الدم الفيك

!مين السمَّاكِ سِفاح
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://sagooor.montadamoslim.com
Admin
Admin
avatar

المساهمات : 166
تاريخ التسجيل : 21/01/2008

مُساهمةموضوع: رد: مكتبه الشاعر ازهري محمد علي   السبت ديسمبر 27, 2008 12:04 am

ثرثرة المياه والعصافير لامرأة بالغة العذوبة /أزهري محمد علي


هيأوني للآن للموت

فقط امنحونى جرعة ماء كعادتكم قبل ارتكاب شهوة الذبح

امنحوني جرعة -ماء

وامنحوا العصافير_ حيزاً للغناء

وصلوا علىَّ واقفاً

سبحاننى أنا

سوف ارفع الأذان فيكم

قبل ميقات التجلى

فحَّي على -الغناء

لا فئة تؤدى الى أختى فاطمة وإلى كل فاطمة.

فاطمة خبّاره ما مرقت على المطره

ولا لاقت أيديها الغيث

معلِّقة روحا في حبل الصبر قادوس

ولا كفّت من الدعوات

على التاكوه باب الروح

ولا فاقت من الفاتوها

فى درب البحر بتكوس

فاطمة حبيبة الاطفال

ضاقت المُرّه ما ضاقت

فارّه بسيمها في الضلام فانوس

غرستها في الارض تيراب

لا كمْلت ولا حاقت

ولا نَقّر عريقها السوس

فاطمة

لافتة تؤدى إلى النص

ممطوره ومتحاشيه البلل

عصفوره في وش الرياح والزيفه

والخوف والعلل

حمّدْني ودْعِك بالرحيل

وقعّدْني دربك بالشلل

عصفورة الوطن الجميل

يا باقة والايام دول

امسينا حاضننك حلم

اصبحنا باكنّك طلل

يا خيّه بحجم الرهان

فى المحنه والخطب الجلل

نص:

حان الآن موعد اذان الغيث

وصلاة المويه على الواطه

الحلبت ضرع الغيمة الدرّا

الغيمه الانشّت في السماء تبروقه

ودشرت همهما من سبلوقة القبله

وفتحت بنيان الافق الواسع

للطير الرجّع عصفورة قلبي المطلوقة

وفرَّ

للشمس السلت روحها

ومرقت من قفطان الليل ذي قرّه

ودعوات القلب الفاتح

لطفله اتبرّت من اوزار الطين

اتوضّت من درن الاحزان المُره

وفتحت للطير الطار القبله

يا طير يا طيب يا صالح

تحلم بس عالم متصالح

ونحلم بالحاصِب في النِّبْله

لي وين بنودّي وشينا الكالح

من اسئلة الارض

ومن نقنقة الغيم الحبلى

نحن القصينا جناح الريح

وعبينا العالم في طبله

يا طير يا طيب يا صالح

ارحل ما شاء الترحال

في طلب المويه وقوت العام

وفِذ ما فَذّ الوز

فى السماء أو عام

وامرق منسلة حلمى الخاص

لرحاب الحلم العام

يا كائن - عام

قفاك اعوج وما طاب

فى البسيطه مقام

يا طير يا طيب يا صالح

منو الفتح الافق لحَمام

فلت من ناب لمخلب

عطش جارح

يغايض الصحراء ببقّه

فى بطن الابل

وريق صبار - يضاير الُّجه

لآخر فجّه

فىذاكرة المياه العذبه

وينتخب المطر سلطان

وكان..ما كان

حديث المويه فى قعدة

بداية الخلق

ابتدر الغناء الصلصال

وكشفت في الهجيج النار

اشتدَّ الانين والطلق

دخلت في الوجع سرسار

وقالت قولتها الفاجعه

-الولادة اتعسَّرت

وانقطع العشم فى صرخه

انقطع حبل الحلم

وندَهْنا:-

يا حلاّل تَحلّها

الواسعه اضيق من رحم ياالله

فاض بينا الحنين لطفله

حتحتنا فى غناها النضم

ويا زوله امّنْتِك غناي

وقهيت وراها نجم نجم

جاييك والايام وراى

مكسوف وخائب ومنهزم

أدِّيني من صبرك معاى

للزيفة والايام هِدم

ادِّيني لروحك درب

واتعلمي انّو العشق

يعنى الغُنا فى من تُحب

يعنى إشتعالك فيك

واخضرارك فى القلب

قرنفلة ونعناعةِ

يا مسبية بي قسَم الوعاظ الباعه

براك اديتي الشواذ العِصمه

ودخّلتي الاغانى الناشزة بيت الطاعة

براك

يا طاهرة فى الزمن النجس

ومستّفة الحيل بغناك

انا ما نسيتك فى الرماد

شان ازرف الدمعات وراك

وانا لوببيعك

ما كان غمدتا الكلمه

فى لُب الجفير

ومرقتا أعزل فى العراك

وانتى فى مفترق الطرق تطمثى

تتحسسى السلك الهلاك-وتهبّشى

للغله فى بيت النمل بتْفّتشى

ماقطّ ماعون من كفاف

الاّ وتُراق موية وشى

يا واقفة فى باب السقط - تدهشي

يمرجحك العطش من بحر الجبل لي دجله

عاودنى الحنين لسحرتك

ساكت حمَتِْي الخجله

انا كل ما شرقت شمس

القاك تنقّبي فى اليقين

من جلدى

وتلعبى فى المفاصل حِجله

كل ما شرقت شمس القاك

تردحى فى المنابر

((هى النار..هى النار))

ما لهلبت جمره فى كبد الرماد

تتشالقى وتاطيها

هى النار.....

قريبة الموية ومريودة السحاب تاريها

مارست الكُمون في روحا

وانقطع طاريها

غبت للنسيم والغيم

ولّبت هواها

غادر الشعراء انهار النبيذ فيها

كنت كفيف والدنيا قيامه

وكل النار بتعاين

فيك مندهشه

وانا جاييك من عبر تقاطع

طالع بين الشوق والوحشة

انا جاييك مهموم

جدعت فيني علق من يوسف

شفتها قامت زي اللهبه

طلعت زي السيف من غمدو

كنا تداعي الجسد الواحد

انتى بتهذي وانا محموم

جريت لقّطِتك من عينهم

جريت بي احساس

الجرى فى النوم

كوركتى المد .. المد

كان النهر فاتح

حضن المدينه سبيل

ومادى الايادى تكّيه

وانا بين صرختك والبر

لوّحت لي آخر غريق ومشيت

لقيت قوس قزح فى كتفى

وشنّقْتَ الغمام طاقّيه

صافحت الحراز للمويه

حمّدنى الخريف بي طيّه

غنيتلك

"قسيم التوبه

حدّث لي ابويا

عشان ازور الدونكى

واجيب لى حبّة مويه"

مويه

لي بت منسابه وعذبه وصافيه

بتنبت فى الجسد اشجار

وتنقع النيل الأزرق

حرِْدَت منى

ودقت ضهر الفيض بالموج

ناديتها العِينه...

صبّت فى الرحم العاقر

وسألت كم؟؟

جرعه بشفى

غليل الواطة؟؟

وصبحت طينه

طلقت شيطان الريح الهوج

ناديت الام المرقت من ضلعى المعوج

فرفر صوتها

وضحكت مليانه

وبرانا برانا اتونّسنا

ونامت مبسوطه ورويانه ، وطامنه

اتعارت توب المويه - واشتعلت

برداً وسلام

صعدت سمّوها البرق

وهبطت سميتها الطاقه الكامنه

وصلينا صلاة المويه على الواطه.
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://sagooor.montadamoslim.com
Admin
Admin
avatar

المساهمات : 166
تاريخ التسجيل : 21/01/2008

مُساهمةموضوع: رد: مكتبه الشاعر ازهري محمد علي   السبت ديسمبر 27, 2008 12:05 am



أبداك من وين
أزهرى محمد على

أبداك من وين
وفينى منك لسه حاجات
من مخاوف ومن شجن
أبداك من وين
وظنى إنك فكرة إعلان الحياه
وإنتهاءات العوارض والمحن
نفسى ألقاك
وأكون أنا كلى من بعضك
أو بعضى من كل بدن
وداير ابقاك وأوحد دورة الدم
المقسمة بينى بينك والسحن
أبداك من وين
أبداك منى ولاَ منك أبتديك محل محل
من ياتو منفذ ادخلك
وكل المنافذ فيك
سداها النحل
من ياتو شارع أوصلك
وكل الدروب معطونة لى آخر الوحل
أستبيح كل الحواجز وأدخلك
من بين مسامك .. أدخلك
من أىَ قاسم مشترك
وشبه التشابه .. أدخلك
ونتلاقى نهرين من تسامى وإشتها
وأبداك من حيث إنتهت عندك
خواتم الإنتهاء
أبداك .. واخلع خيام عمرى المضى
والقاك مبسوطة اليدين
مفتوحة أبواب الرّضا
أبداك من لحظة آنستك نار
وأخدت من قبسك هدى
وانا ضمه زاهد
فى الدروب الما بتجيك
ولا بترجع لىّ من تالاك صدى
أبداك من وين ؟؟؟
من وين ....!!!
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://sagooor.montadamoslim.com
Admin
Admin
avatar

المساهمات : 166
تاريخ التسجيل : 21/01/2008

مُساهمةموضوع: رد: مكتبه الشاعر ازهري محمد علي   السبت ديسمبر 27, 2008 12:05 am



الخروج من بيت النمل
أزهرى محمد على

تمى غناك الخمجان
وزودى إيقاع الرقص
ومحل ما تمدى إيدك
أنزلى أمطار
وريحى أعصاب الطقس
مدستر فيك الزول الجواى
ومنك أول زول
نازل دستوروا معاى
أول زول صالحته لوجه الأرض
كان منك
آخر زول ناهر خوفى
وعارف معنى الرفض
كان منك
يا متوهطة حلم الكل
ومعلنة إنك ضد البعض
أنا راغب أستخلص عذبك
من بحر الشك المالح
أسقيك حليب الروح
أكسيك من عُري الزمن الفاضح
يا وحم العشق المحموم
ومخاض الجرح الفادح
أنا ليه قدامك .. دون
وعدتك نمشى نخصب حلم المويه
بوعد الرمل
رجعنا نكلم حلم المويه
برفض الرمل
وقعدنا بنقطع فى المويه وفى الرمل
سرقوك منى ودسوك
فى بيت النمل
طراك الصهيل حس الصرير فى بابى
أنا عازمك مقيل ومخصمك ما تابى
خليهو العويل كان يسترك جلبابى
يا جدية العُزاز ما بلحقك نشابى
فى الوادى الفسيح مرقت براها كلابى
فزت فى القنيص صدّن بلاها كلابى
أدتنى السلام سلمتها السبابى
حنت للرحيل رحلت مع الجلابى
وحّيدا الكتيل كتل المنخلع للدابى
ويا خيه .. كل البراحات وسوسه
الهاويه خلفك والبحر
وقدمك طنين الهلوسه
محمدك ساساق دروب الهم
محمدك .. طول المدى الشاسع
بين الإيدين والفم
ويا إنتى العشم مزبوح
أدسك فى خلايا الدم
تمرقى بى خراج الروح
حمل كاذب رعد أبكم
حبل متروك على القارب
واشوفك فى الحصار باهته
نتف غضب العُصار ريشك
حتل فيك الكلام الرخو
نقز فى دمى درويشك
واظنك إنتى
غشاك الشعور بالزهو
سقط سهواً غناك الكان
بكلب جلدة الغفوة
وينفذ من مسام الصحو
لكنك بتطلعى من حوافر الخوف
تطلعى من حلم مهووس
ومن فجة سفر طول
يسربك الحنين فينى
تعلنى عن زمن آتى
تعلنى عن وطن أجمل

الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://sagooor.montadamoslim.com
Admin
Admin
avatar

المساهمات : 166
تاريخ التسجيل : 21/01/2008

مُساهمةموضوع: رد: مكتبه الشاعر ازهري محمد علي   السبت ديسمبر 27, 2008 12:06 am



حضنك البستان
أزهرى محمد على

مرقت من نهرك جرف أخضر
بقامة حضنك البستان
بقامة يشتهيك الطل
وتحشد الحديقة هديل
تنفض المدينه رهام
جنون الإعتصام
فى بت تفسح
ضحكتا الطاعمه
تستف ما يشاء الدل
مسامات الأزقة ضحك
يسلم ضحكتا الدخان
!!! جـــــنـــــون
نفخ فيها الإله روحو
مرق إحساسا
من طين الحما المسنون
! فعمَ يتسائلون
! عن الوعد اليقين
إذا أنتبذت حفيده الطين
أقاصى الجرح دارين من حنين
وغنيَت لى فرح وهَاج
وحلت زى حلول الروح
جسد فى جبة الحلاَج
وهاج وحم الخليقه عليها
أمشاج إبتلت أمشاج
ما تاكت الباب البجيب الريح
ولا واربت نفاج
ومحتاج لى ضفتين من شوق
إذا الهدَام بلغ قيفك
أدخلى ما تسع إيديك
وامرقى ما يسع كيفك
أنا اتسلبط فى لونك
عشان اسرقك من شمس تفرَ الضو
على أبعد نفق فى الروح
ألون من مزيج طيفك
منو السماك ضرة المويه
ونديدة النار
يوم حتحتك فينا الرعاف
منو العلمك
نسج التباريح فى العصب
وانتى بتجلبى الغله
فى سنينا العجاف ؟
بخاف تجهرك موية الرهاب
وفى السكة بستفك وهم
وانا باتجاهك محتشد
بالرغبه واحساس اللغم
! أنا متهم إنى البحبك للأبد
فكره وبساسق فيك
من ذرة بخار
المويه لى قاع اللحد
البنيات المن حلاتن عشرقن
ركن على غُصنى بيقوقن
نقدن قندول غناى
ونقطن شهد ولبن ...
! وفاتن مشن
فاتن مسافة يلمحنك ويمحن
فاتن مسافة يكبحن
جماح الرغبه والحاح الجسد
فاتن مسافة يلفحنك
من رمض أو يمنحنك ضُل
رتَبى مدخلات العشق
فراش بين الرحيق والفُل
بناديلك حبيبة القلب
ينادولك حبيبة الكل
جرف أخضر بقامة حضنك البستان
بقامة يشتهيك الطل وتحتشد الحديقة هديل
تنفض المدينه رهان
جنون الإعتصام فى بت
تفسح ضحكتا الطاعمه
تستف ما يشاء الدَل
مسامات الأزقة ضحك
نفخ فيها الإله روحو
مرق إحساسا
من طين الحما المسنون
جنون !!!
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://sagooor.montadamoslim.com
Admin
Admin
avatar

المساهمات : 166
تاريخ التسجيل : 21/01/2008

مُساهمةموضوع: رد: مكتبه الشاعر ازهري محمد علي   السبت ديسمبر 27, 2008 12:07 am



خاطر الحبيبة
أزهرى محمد على


جرحت ليه خاطر الحبيبة ؟

الحبيبة
المشطت عصب التضاريس
وهدت على كل الخرايط .. والفراغات
مدهونة بى لونا أرصفة المحطات
واقده من ريقا الفوانيس
جرحت ليه خاطر الحبيبة
دى السكة أبعد من حدود الإحتمال
والجرح أعمق من بكا الليل والنويح
ويوم استفزت قدرتك
قيمة المسافات
عرفت إنك قليل حيله وفصيح
ستفت عمرك فى حقايب الرجعه
للسفر القديم
مرقت تشهل غربتك
وبى توبا تستر عورة الزمن اللئيم
ماهى دى الحبيبة
الشحتفت روحى
ومعطنه فى ينابيع الألق
الشاربه من فجر الشروق
وما خده من لون الشفق
ما هى دى الحبيبة
الداخله من بين مسامات العرق
رقراق
وطالعة زى قمر الدُجى
وسايقانى فى كل الدروب ساساق
راميانى حد القريفه
وقاليانى زى قهوة بجا
ما هى دى الحبيبة
يومى المشيت مجبور
علي السكة المريبة
أدتنى إحساسا الرطب
وشهرت ضحكتا العذبة ومشت
كانت رؤاها بتحتشد
زى نار
بتسجن روحها فى عود الثقاب
وتعهلن مهرجانات الحريق
لو كشت الواطة ولقيتا
ما كنت ضليت الطريق
ودفقت مويتى على الرهاب
مشيت ورا الشدر اليمامه
دى الرتبت خدر الحنين
فى الروح وعبت دوار النشوه
فى جسد الندامه
وانا كنت مفتون
بى تداعى اليابسه
فى عرس التساب
مشدود على حبل الصعود أفل
مشلهت بالأيادى الفوق
مشهلت والبدن منحل
لفحت من الأرض طرقه
مرقت على البحر شاشوق
لقيت توب البحر خرقه
لقيت درب الرجوع أطول
هيا يازولة
المخارج وين ؟
لا غلت يداك عن حل
غلبت فى الحيل البلمك
من حبال الصوت
وبندهلك تعالى .. تعالى
ما وردت مرحاكه البيوت الناشفه
ساساقك عبث
شن قدرتك تنسلى
من قلب الضلمه الحالكه خنجر
من قبس
من وين أجيبلك
قدرة تستلهم رؤاك
وانا جاى من وحشة سنينى
المرة
بى آخر نفس
من .. وين .. ؟؟
أجيبلك قدره بس
من وين
وانا هد احساسى السفر
أنا بندهك لو مره
ضفه اتبرجت
حلت ضفاير للبحر
بندهك لو لبش الموج فى الطمى
والشاطئ فى ذروة
المد انكسر
وأنا بعزمك على مويه
عذبة وضل وريف لو هم سقط
من طاقه فى حلم الحبيبه
وانتحر
جرحت ليه خاطر الحبيبه .
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://sagooor.montadamoslim.com
Admin
Admin
avatar

المساهمات : 166
تاريخ التسجيل : 21/01/2008

مُساهمةموضوع: رد: مكتبه الشاعر ازهري محمد علي   السبت ديسمبر 27, 2008 12:07 am



بـحـبـك بـحـر

مـــعـــاى
وغشيتك أسلم عليك
أتكّل قصادك
هموم الحراز
أطمّن طيوف الخريف الوشيك
أبشر دواخلك بوعد الرزاز
مودر ملامحك
غبيتك
لقيتك
بتلفظ شوارعك بيوتك
تصادر خطاك وتكاجر مشيك
تغالط حواسك ملامحك
وتحرد عيونك مقاطع وشيك
سألتك خبارك ؟!
مسُوكر لسانك
! وصمتك يشفق
خبارك ! بتغرب شموسك
زمان الشموس البتشرق
تضيع الملاحه التعطن وجيهك
ومّنك تدفق
! خبارك غريبة
أقلب دواخلك
أكوس الحبيبة اللى عنك بتفرق
بتفرق حبيبتى البتلبس فصول الخصوبة
بتضحك أغانى
وتدفق عذوبة وبتنزل مطر
عشقتك لأنك حبيبتى
وبحبك بحر
عشقتك لأنك خواتم الحقيقة
وطريق الوصول لأنك بداية الخليقة واساس القبول
أحيّى الغيوم البتفطم ذبولك
ترضع سهولك ، مواسم الهطول
واحيّي المدائن البتفتح حدودا
وتمنح عيونك جواز الدخول
يزيد خيرك
ولا طابت بلاك عيشة
مقسمة إنت فى غيرك
مقسمة فيك ما فيشه
ومخيم ليلك العسعس
لا برقن بروق صحوك
لا صبحك رضى اتنفس
يحندك فى العطش غيمك
تمطري إنت فى الخاطر
وتنفضي من دواخلى العس
بديت أتسامى للآخر
رميت توب البيات الرث
قويت إتيقنت روحي
وسقط منى الكلام الغث
أنا الدّاخرك بصيرة وشوف
يا بقعة ضو
فى عتمة قلبى المحفوف
ومسربل فى بالشتا والليل
والخوف
فارغة ومليان بيك
وضيقه عليك البشره
أنا غيبتك بينى وكنتك
زمَََََََََََلتك فى الخاطر بُشرى
مزَقت ستار الجلد الهش
وطلعتى من الجسد القشرة
تاوقت
لقيتك فينى النفس الكاملة
تتوقى اليابسة
والنهر فى إيدك صلصال
يتسارق ضوَك خافت
متهافت نحوك أجرى
مهرول راكض
سابقت خُطاى وحدقتك
غيمة .. وضل .. وبُحيره
ضاريتك بينى وضاريتك
من الحزن القابض
نفسى وروحى واقف عارض
ستفت عيونك بالمطرة
وقرحتك ضد الزمن الراكض
وحدقتك حبيبتى
البتشبه فصول الخصوبه
تضحك أغانى وتدفق عذوبة
وبتنزل مطر
عشقتك لأنك حبيبتى
وبحبك بحر .
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://sagooor.montadamoslim.com
Admin
Admin
avatar

المساهمات : 166
تاريخ التسجيل : 21/01/2008

مُساهمةموضوع: رد: مكتبه الشاعر ازهري محمد علي   السبت ديسمبر 27, 2008 12:08 am



سلامات
إلى إنبثاق نفسي على – داخلى
إلى مصطفى سيداحمد
ازهرى محمد على

مدخل أول :
لمتين متيمم شطر النيل
متوقى اليابسة .. ووارد
متوكى الغنية .. عصا موسى
بتهش فى غيم الإلفة .. الشارد
مهدودة القُدرة وفترانة
حردان الضل البارد
بتوجل لى يوسف فى البير
يطلع من بطن البير المارد

مدخل ثاني :
فات الكان بدينا إحساس بالإلفة
وكان راوينا
فات الباكى جراحنا وناسى جروحو
ولا فى ورانا مدينة .. مدينة
فات الصاحى
ونحن نغط فى النومة السابعة
طالق حسو ولا حاسينا
حتحت فينا غناهو الطاعم
وفات قنعان من خيراً فينا
سلامات يازول يا رائع
سلامات .. عوافى
سلامات يا خلاصة الخير الفى الناس
وترياق الزمن المتعافى
سلامات يا زول يا رائع
سلامات عوافى
............ ............ ...........
محاصر فيك بسأل عن سكة تطلع منك
أو سكة تودي عليك
بسأل عن مخرج منك ... وليك
زى نهر بينبع ... وما لاقى مصب
بتمدد عشقك فى أقصى ضواحى الروح
لى أقصى نواحى القلب
يتكثف بسعة إطلاق الربّ
وانا كنت بفلى القلب بسيرتك
سميتك حلاب الغيم
من ضرع الجدب
وطنيتك مارست الفعل .. السرى
وحفظت فحولة النيل ... أيام الخصب
ولمحتك وانت بتمشى وترقص فى حمامك
على حُمة إيقاع الحرب
وتكلكل جلد الكلمة الحافة
لحبيبة بتفتح مجرى الغنا فى الدم
وتفلس باب القلب
فيا بنوت الشارع الطاعم قومن كب
قومن لى الما قصر فى غناكن .. ضمة
ولا إتلوم بى وراكن تب
ولو تبقى السكة الجاية ضهب
وسلامات يا زول يا رائع
.......... .......... .........
البارح عفورتك ركت فى البال
رقصت
وادت عصفور الريد شبال
وطارت من قولة كر
ما الزول النهر العصفورة
بحرض فى كلاب الحر
لا بسنى وداخل فى اللحم الحى
راصد كل البسأل عن حالى
حرش ضلى على
ونتف زغب الخاطرة ... التخطر على بالى
ومنع العصفورة تحوم
إستجوب كل الناس التجى فى النوم
ماتقول !!
يازول يارائع ... ومهموم
يا مضيع ضى عينيى .. وراك
واقف حاحاى لى النوم
يا مستف رئة الدنيا شهيق
ومشحتف روح الخرطوم
كيف حال يا ابوى
كي حال يا خال
..... وتعال !
إتفضل على باحة بيتنا .. الطيب
ما عون الأطفال
ضمد جراحاتك .. تعال
من ضلاماتك .. تعال
أدينا هينين من صبر
السكة أبعد من مشيك
والجرح أعمق من حدود الإحتمال
السابلة والأطفال هناك
قدامك المشوار .. طويل
والريح .. وراك
كل البيوت
إتشرفت .. لى طلعتك
والونسه ماكملت .. معاك
القرقراب .. والقهقهة
مين سمى ترحالك .. غياب !
والغيبة بتزيدك بها
لويرتق الحزن المصاب
كان بعدك الموت إنتهى
يا أقصى حالات الحضور المشتهى
يا منتهى
تعال فرحنا بى دهشت غناك الحى
وحى من جرحك الدامى
وفتر حيلك
وحى من ضلك الرامى
وحمل شيلك
تموت متل الشدر واقف
تموت واقف على حيلك
فيا حليلك
يا حليلك بنستناك
على صهوة جياد الريح
بنستناك
فى الزمن اللديح القيح
بنستناك
على باب الحلم فى غناك
بنستناك
رحيلك شلهت الدنيا
ورتب العالم البى هناك
بنستناك
وانا تانى وراك .. شن لاحق؟
دهستنى فى بعدك حدود الخوف
الداخلة على بالساحق
أدينى القدرة التمنحنى
بحجمك سعة الشوف
لو أقدر أطل من شاهق
لو أقدر ألوح لى عيونك
تلمحنى
وانا ضعفى أمامك فاضحنى
سامحنى
ما قدرتا أطولك سامحنى
........... ............ ...........
شفتك من وجع طالع
من برزخ ملتقى النيلين
كنت هناك ... وحيدك
وكل الناس ... اتنين ... اتنين
براك واقف حد السيف
براك الما وقف بين ... بين
تغازل حلمك الفارع
فتح بابين على الملكوت
تسلم على حضرة جلال الموت
وتفتح فى الارض نفاج
إذا امتلأ الفراغ ... بالصوت
فيا باطن الاديم أفتح
براحات الحنين ... مشرع
وأنده لى مدن شاخت
أنده لأطلال القري .. الراحت
بيوت فى بيوت
تمرق من شبر مسرح
مدن فاضلة
وعالم بى إتساع الحلم
بقامة يشتهى التابوت
فما لفظ البحر يونس
ولا إنسدت شهية الحوت
ويا زول يا رائع
تمشى بالحسرة .... وتموت ؟؟!!
سلامات
يا زول يا رائع .
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://sagooor.montadamoslim.com
Admin
Admin
avatar

المساهمات : 166
تاريخ التسجيل : 21/01/2008

مُساهمةموضوع: رد: مكتبه الشاعر ازهري محمد علي   السبت ديسمبر 27, 2008 12:08 am

يا مشرع الحلم الفسيح
أنا بينى مابينك جزر
تترامى .. والموج اللّديح
القدرة والزاد الشحيح
كملتو .. ما كِمل الصبر
نتلاقى فى الزمن المريح
ميعادنا فى وش الفجر
يا مشرع الحلم الفسيح
***************
يا مشرع الحلم الفسيح
يا بعض منى .. وفينى ساكن
أنا أصلى منك ومشتهيك
و بيناتنا ليل الغربة ... داكِنْ
هبّة هبوبك..
أفتح شبابيك المساكن
وسـِّع دروبك ..
ولـِّع مصابيح الأماكن
يا مشرع الحلم الفسيح
*************
يا مشرع الحلم الفسيح
يومنا النـّهِـبْ .. أسلِبنا خوفنا
كبـِّرنا قدرك .. مرتين
وطـِّول قدر كتفك .. كتوفنا
يا رغبة الرعد البيسكن ..
بين غناوينا وحروفنا
ضوِّى الدساكر والضفاف
عبِّى الحناجر بالهتاف
سدِّد مسامات الرِّعاف
نوِّر مغاراتنا وكهوفنا
*******************
يا مشرع الحلم الفسيح
أنا وإنت .. والمطر الفصيح
حانطوِّع الزمن القبيح
نأخد بعض .. شكل السما
حدِّثنى دايماً .. كلما
تنشف على البر الضفادع
يهجر الضو المواضع
وتسقط من الكف الأصابع
حدثني دايماً كلما
تحرد مراسيك السفن
تسكن مرافيك الزعامات .. الدُمى
حدثنى لو تاهت خطانا ..
على الدروب المبهمة
أو ربما..
تهدم آلات الشوارع ..
وترجمْ العُزّى الصواقِع
حدثنى لو مطرك همى ..
حدثنى لو صادف الكى المواجع
وضلك على الساحل رمى
حدثنى لو مطرك همى
علمنا دايماً كلما
نبذر على أرضك شهيد
يطلع شمس ..
يبهر بأنوارو السما

يا مشرع الحلم الفسيح
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://sagooor.montadamoslim.com
Admin
Admin
avatar

المساهمات : 166
تاريخ التسجيل : 21/01/2008

مُساهمةموضوع: رد: مكتبه الشاعر ازهري محمد علي   السبت ديسمبر 27, 2008 12:09 am


وضّـاحه

الـصباح الـباهى لونك
وضّـاحه يافجر المشارق
غـابة الأبـنوس عيونك
يَـابْنَيّه مـن خُبز iلفنادق
شـيدتي في جواىْصوامع للفرح
وفـتحتِ في دُنياي مسارح
لــــلـــمَـــرحْ
وبـقـيـتـي لــــيْ
سِــكّــه وعــيـون
لا قِـــدرْتَ أطـولـكْ
شــــان أجــيــكْ
لا قِـدرْتَ من غيرِكْ أكونْ
وانـا بـيك مالينى الكلام
حرّكت بيك عصب السكونْ
جَـلبتَ لـيكْ الغيم رحط
طـرّزتَ ليكْ النيل زفاف
حَــرَقْــت ليك
الــشــوق بــخـور
وفــرشــتَ لــيـك
الــريــد لِــحَـافْ
لا الـسِكَّه بـيكِ بِـتِنْتهي
ولا مـعاك ملّيت الطواف
يـا ريتني لو أقْدَر أكونِك
الـصباح الـباهى لونك
يَـابْنَيّه مـن خُبز الفنادقْ
غـابة الأبـنوس عيونك
وضّـــــاحــــه
لــو طــال ا لطريق
بـيناتْنا واتـرامي الـمدى
وصنَّت مَسَامْعِكْ من iiنِداي
شِـرْبَتْ فـيافيِك ا لصدى
مـا تـحنِْى هامات النخيل
مـا تـرمي دَمَعاتالندى
مـا تْشنِّفى الزمن الجميل
دا الـعُمرِ يـا دابـو اْبتدا
! والعُمْرِ إيه حيكون iiبدونِك
وضّـاحهَ يا فجر المشارِق
الـصباح الـباهى لـونِك
يـا بـنيه من خبز الفنادقْ
غـابة الأبـنوس عيونك
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://sagooor.montadamoslim.com
Admin
Admin
avatar

المساهمات : 166
تاريخ التسجيل : 21/01/2008

مُساهمةموضوع: رد: مكتبه الشاعر ازهري محمد علي   السبت ديسمبر 27, 2008 12:12 am

الطشاش


غيب إحساس الرضى
ومسَح الروح بالغباش
وانا ما نعيت
طيب معشرك
ولا أقمت عليك عزا
إشتهيت أفرد ضفيرتك للمطر
واحقن وريدك بالدُعاش
واكتفيت
أفضل أريدك إندهاش
أو ألوذ بي نفسي عنك
! يامدهشة
أنا وين أفوت منك أمش؟
بشفق عليك
من حسن ظنك
بالملايكة المارقه من باب الشمس
يا جابدة من تحتى الأرض
وقابضة فى نفسى العرش
يا نابضة من عطش الجسد للروح
مجلوبة إنت ومستباحه
كل المواعيد الزنيمه
كانت مباحة
ومطلقة
كل البراحات الحميمة
موصوده دونك ومغلقه
مسجونه فيك
إنتظارات السحاب
والإحتمالات المريحه ومقلقه
محلوبه من دمك عصارة العفه
فيك
لا فُضّ فيك
يا صومعة إملاقى والعشق المحال
دقت مسامير الفجيعه
على العُضام الحيه واللحم الحلال
بتمرقى من وجع المحجَه
وتندسى بين جرحى العُضال
وما انبله حلقك بالإجابات السؤال
فعلام جدواه .. السؤال
علام جدواه السؤال
وفارسك مدجج بالدعاوى الخايبه
والوعد الحنوط
رددتى فى سرك جلالات الهزيمة
وتليت على سرى التشهد والقنوت
مطموسة فيك كل الصحايح
بالفضايح
الواقفه شاهد والبيوت
وتعارضه ما بين الضحك والعبره
شوكة حوت
فعلام جدواه السؤال
يا باحثه عن كل السواقط
من نهاراتنا المهمة
ونابتة من خيبة أملنا
مع الليالى المدلهمة
يا متعبة
ومحقونة بى خدر الأمانى
المستجمة
أنا ما دلقتك للشوارع البارده
ولا البيوت المترفه
لو راودك عن نفسك الماجن الدّعى
وهدّ عزمك بالوعود الزايفه
ما تنسى إنك كنت وافقه
على المسامير الصقر
مجليه بى عرق الشفا
لا شاكيه من ذل العوز
لا باكية من وجع الجفا
وأنا ما دلقتك للشوارع البارده
ولا البيوت المترفه
يا واقفه مشروخه وأبيه يا نحملك شرف القبيله
ونغرمك سيف القضيه أو نبعثـك حُـرة ونـبيّه
لو قد ثوبك من قفا وأنا ما دلقتك .. ما دلقتك

الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://sagooor.montadamoslim.com
Admin
Admin
avatar

المساهمات : 166
تاريخ التسجيل : 21/01/2008

مُساهمةموضوع: رد: مكتبه الشاعر ازهري محمد علي   السبت ديسمبر 27, 2008 12:13 am




يا مفتونه
بصدق الوَعدْ
يا مسكونه بحلم الغَدْ
أنا خيّرتكْ
بين الشّهَدْ
وبين البُّن الفِطْرِهَ
وانتِ اخترتي سَواد البُّن
وطَعْمَ القهوه البِكْرَه
أنا خيّرتكْ...
وانتِ اخترتي ،
هل قدَّرتي الرُقعَه الواقعه
بين الليله وْأحلام بكرهْ
وكيف حَتْمِلى الحِتَّه الواسعه
بين الواقع وبين الفكره
وين حتلقي المويه الناقعهْ
يوم نصطادِ في المويه العِكْرَه؟
أنا بدّيكِ موانع الصاقعه
إنتِ ادِّينى الموت السُتره
أنا خيّرتك...
وانتِ اخترتي
واقف جَنْبِك لو إحترتى
بايع نفسي وشارِيكِ
دافنِكْ بيني مُواريكِ
واصْلِك مَنّى أتاريكِ
لوتعْرفي يوم شاهدْتِكْ
من روحي بتَدخُلي فى نفسي
باريتكْ خلِسَه وغازلِتكْ
سمعّتِك وما سامع همسي
كضّبتَ عيوني وصدّقتِكْ
غّيبتَ احساسك في حسِّي
وناديتك:
يا مطمنِّه فى قلبى الخوف
بتونِّسي روحي وبتحَجَّي
بترجِّعي لعيوني الشوف
اتلوّمى دايما واحتجّي
مشتاقِلكْ جداً وملهوف
واقف فى دَرْبِكْ مُترجِّى
وحَجيجِكْ بي قَلبي يطوف
جوايَ بِتْعتمرى وْبِتْحِجِىّ
وانا جيتِكْ
مكسور الخاطر
جيِتكْ مجروحْ
ولقيتِكْ مفضوح الصمت
ألفي عيونِك بالبوح
مَمْحوق الزمن البين ضحِكْ والنوحْ
سَكّنتِكْ كل الأنفاس الحيّه
وسلَّمتِك مُفتاح الروحْ
لو تعرفي يوم هدهدتِك
فى ليل بستجدى الغَمْضه
أقدامِكْ كانت فى الصحرا
وايديك فى الْبَحرْ بِتتْوضا
كم حائط ينهض بيناتنا
كم حائط من بينا اتْهَدَّ
قاومتَ الرهبه وناديتِكْ
والصوت من عندِك مارَدَّ
طاوعت الرغبه وغَنيتِكْ
غنيت للمرأه الورده

الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://sagooor.montadamoslim.com
 
مكتبه الشاعر ازهري محمد علي
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
sagooor :: منتدي شعراء السودان-
انتقل الى: